الخميس، 8 مارس 2012

لـــما بأفــلس ـ (القلب الكتاكت)

من Magdy Mansour‏ في 6 مارس، 2012‏ في 06:14 مساءً‏ ·‏

المثل بيقول ( الخواجه لما يفلس يبحث بدفاتره القديمه) بس انا الحكايه معايا مش فلس بقدر ما هى الحاح موضوع قديم كنت كتبته فى جروب تركته من زمان أسمه ( هارمونى عربى ) وكان الموضوع ده بعنوان ( القلب الكتاكت) .. ولما كتبته كان الزمان غير الزمان ولإن الزمان إتغير عاوز أكتبه تانى بس يكون معبراً عن الزمن الحالى .. لذا سأكتبه مثل ما كتبته سالفاً إلا من إدخال التعديلات  التى أشعر ان أُدخالها يناسب وقتنا الحالى : >
وأقول : القلب الكتاكت. اللى كاتم وساكت .. بتقولها الست المغلوبه على أمرها لما يكون جوزها سى السيد أحمد عبد الجواد .. وهى الست أمينه .. بس نفسى أفهم يعنى ايه كتاكت .. ولأنى ضليع فى قواعد اللغه العاميه
كلمه كتاكت مشتقه من كلمة كتوت . لا ن الكتكوت مكتكت وصغنون وضعيف ومالوش ريش ولا يستطيع فعل شيىء غير الصوصوه مش عارف ليه على أساس إن الفرخه ما بترضعش.. المهم هوا كده قلب الست المهيضة الجناح والزلمكه لانها مش عارفه تاخد حقوقها من سى السيد لانه هوا اللى مالك المونى ( الفلوس) والمتحكم فى كل صغيره وكبيره ( زى أمريكا يعنى) علشان كده ما بيدها حيله حتى الكتكوت بيقدر ينفس عن نفسه بالصوصه.. إلا هيا ياولداه كتم والقلب الكتاكت كاتم وساكت .. الله يلعن أبو السكات ياشيخ .. زى اليومين دول فى سحابه سكات سوده مغيمه على القطر المصرى سبحان الله حالة خرس .. مخليه البلد قلبها الكتاكت مكتوم وةساكت زى الست أمينه .. والله يخرب بيتك ياسى السيد ياللى معاك المعونه ( قصدى الفلوس) اللى زالل مصر بيها  يووووه  قصدى الست أمينه.. لكن أرجع وأقول الست أمينه خرجت عن طوع سيى السيد .. لما سيدنا الحسين حاء لها فى الحلم وناداها تزوره ما كدبتش خبر .. وسبحان الله حبايب سيدنا الحسين  اللى واقفين لسى السيد زى العقله فى الزور نفسهم فى نظره  من الست أمينه .. وساعاتها سى السيد هايجى لها راكع .. وقلبها الكتاكت اللى مكتوم وساكت .. هايجعر بأعلى صوته .. بس برضه ولاد الست  أمينه .. خانعين ومرحرحين وراضين لها بالمرمطه ما بين سى السيد المفترى وما بين أحباب سيدنا الحسين
وكل ده من الفلس الله يكفينا ويكفيكوا شر الفلس والنحس وكتمه النفس

ليست هناك تعليقات :

إرسال تعليق